يقول أحدهم :
ياريف قلبـي للمساييـر قـم شـب
وحط المناره فـي طويـل الضلالـي
عقب تشق لها لجزل الحطـب جـب
وهات النجر وأحضر جـداد الدلالـي
ثلاثن الهن راعـي الكيـف يطـرب
وسوطهن ضمـر والآخـر جلالـي
وبطونهن ماخذن اسبوعن عن الـرب
وجنوبهـن صفـرً تـلالا تـلالـي
والرابعـه ملقامـةٍ لونهـا أصهـب
حيـث إنهـا للنـار دايـم تصالـي
ولاجبت كل شروطها اللـي تطلـب
إجلـس عليهـن يازعيـم العيـالـي
وإحمـس لنـا بريـة ٍحبهـا أشهـب
وبهارهـا هنـدي وماهـا زلالــي
وإعـرف تـرى قانونهـا مايخـرب
وندارهـا ينقـى ومـاهـا يكـالـي
تـراه مايصلـح لهـا كـل مذهـب
ولاتقبـل الراضـه ولا الاعتجـالـي
وليا حمست إحرص على حمسة الحب
واعرف ترى الحمسه تبي وسع بالي
تاخذ على ادنى الجمـر فتـره تقلـب
لين العـرق يطلـع سـوات اللوالـي
ومن يوم يطلـع فالمبـرد لهـا كـب
لين النـدار ان كـان فيهـا يشالـي
وليـا خـذت مقـدار للنجـر قـرب
ودنه بصـوتٍ يسمعـه كـل غالـي
دنـه وخلـه للمسايـيـر يـجـذب
لاقـام صوتـه للنشـامـى يـلالـي
يوحونـه الجيـران لاقــم يقـنـب
ويجيك الاقصى والقصيـر الموالـي
وعقـب تـدق البـن لقـم وركـب
ليـن انهـا تسمـح مـن الاجتوالـي
وقبل تبهرهـا عـن النـار تجـذب
وتركد شويه ليـن يصفـى الحثالـي
وبرويد في أحدى المباهيـر تسكـب
من عقب غال الهيـل فيهـا يهالـي
واعـرف ليـا بهرتهـا يالمشـبـب
تـراه يكفيهـا مـن النـار صالـي
ثم اجذها مـن يـوم بالهيـل تقلـب
ومن يـوم تركـد صبهـا للرجالـي
حتى يجي الفنجـال منهـا لياصـب
بين الشقـار وبيـن لـون الشعالـي
يطرب لها من كان للكيـف يشـرب
كيف النشامى اللي من العيب خالـي
واعـرف تراهـا عـادةٍ ماتسـيـب
ولاينتقدهـا إلا قصـيـر الحبـالـي
احرص تخلـي عـادة الجـد والاب
ما هم عليه اول عليـه انـت تالـي
تراك مـن كـل المناسـب معـرب
مابيـن جـدان وعمـام وخـوالـي
وابيـك عـن منهاجهـم مـا تجنـب
ان كـان فكنـك بـنـات الليـالـي
تحياتي ..
غير متواجد حالياً
القهوه وعيون الشعر
العرض العادي
